11. x|y : Cartesian Duo

ਇਹ ਵੀ ਮੇਰੇ ਹੀ ਲੋਕ ਨ। ਦਸਦੇ ਨ ਪਹਿਲੋਂ-ਪਹਿਲ ਇਹ ਦੋਵ੍ਹੇਂ, ਇਕ ਹੀ ਬੰਦਾ ਹੋਵੰਦੇ ਸਨ। ਇਕ ਦਿਨ ਓਸ ਬੰਦੇ ਦੇ ਦਿਮਾਗ ਚ ਗੱਲ ਆਈ, ਕਿ ਓਹ ਕੌਣ ਏ ਤੇ ਕਿੱਥੇ ਏ। ਓਹ ਨੇ “ਕੌਣ ਹੈ ਤੇ ਕਿੱਥੇ-ਕਿੱਥੇ ਹੈ” ਦਾ ਰੌਲ਼ਾ ਪਾ ਲਿਆ। ਸਭ ਨੇ ਓਨੂੰ ਦੱਸਣ ਦਾ ਯਤਨ ਕੀਤਾ ਕਿ ਓਹ “ਓਹ” ਹੈ, ਤੇ “ਕਿੱਥੇ” ਹੀ ਹੈ ਜਿੱਥੇ ਓਹ ਅਸਲ ਚ ਹੈ ਸਾ। ਪਰ ਉਹ ਮੰਨਿਆ ਨਾ ਤੇ ਅੱਗੋਂ ਪੁੱਛਣ ਲੱਗਿਆ, “ਮੈਂ-ਨੂੰ ਦੱਸਣ ਵਾਲ਼ੇ ਤੁਸੀਂ ਕੌਣ ਹੋ, ਤੇ ਕਿੱਥੇ ਹੋ”? ਫਿਰ ਕਿਸੇ ਸਿਆਣੇ ਨੇ ਓਨੂੰ ਕਾਗਤ ‘ਪਰ ਨਕਸ਼ਾ ਵਾਹ ਕੇ ਦੱਸਿਆ, ਜਿਸ ਚ ਪਤਾ ਲਗਦਾ ਸੀ ਕਿ ਕੌਣ ਕੀ-ਕੀ ਹੈ ਤੇ ਕਿੱਥੇ-ਕਿੱਥੇ ਹੈ। ਓਹ ਨਕਸ਼ਾ ਮੈਂ ਹੇਠਾਂ ਨੱਥੀ ਕਰ ਰਿਹਾਂ।

ਇਸ ਚ ਓਹ ਇਕ ਬੰਦਾ ਕਿਸੇ ਕਾਰਨ ਦੋ ਬੰਦੇ ਬਣ ਜਾਵੰਦਾ ਏ, ਤੇ “ਕੁਝ ਨਹੀਂ” ਤੇ “ਕਿਹ-ਥੇ ਨਹੀਂ” ਦੁਆਲੇ, ਕੁਝ-ਕੁਝ ਹੋਈ ਹਾਵੰਦਾ (ਹੋਨਾ) ਚੱਕਰ ਲਾਵੰਦਾ ਏ। ਵੇੱਖਣ ਨੂੰ ਚੌਰਸ ਲਗਦਾ ਏ, ਪਰ ਹੈ ਵੇ ਗੋਲ ਓਹ ਵੀ ਗੋਲ਼-ਪੱਥਰ ਵਾਂਙ ਰਿੜ੍ਹਦਾ। ਇਸ ਘੁੰਮਦੇ ਗੋਲ਼ੇ ਅੰਦਰ ਤੁਸੀਂ ਕੁਝ ਵੀ ਨਹੀਂ ਤੋਂ ਲੈ ਕੇ ਕੁਝ ਨਾ ਕੁਝ, ਤੇ ਵੱਖ-ਵੱਖ ਸਮੇਂ ਤੇ ਕਈ ਥਾਵ੍ਹਾਂ ‘ਤੇ ਹੋ ਸਕਦੇ ਓ। ਗੋਲ਼ੇ ਤੋਂ ਬਾਹਰ ਅਸਾਂ-ਨੂੰ ਕੁਝ ਨਹੀਂ ਪਤਾ, ਬਿੱਲੂ ਕਹਿੰਦਾ ਏ ਓਹ-ਨੂੰ asymptote ਆਖਦੇ ਨ।

ਉਦਾਹਰਣ:
Y (ਜਿਸ ਦਾ ਪਤਾ ਨਹੀਂ, ਓਹ ਕੁਝ ਵੀ ਹੋ ਸਕਦਾ ਏ, ਇਸ ਲਈ ਓਹ-ਨੂੰ ਕਾਂਟ੍ਹਾ ਆਖਦੇ ਨ) ਕੁਝ ਨਹੀਂ ਤੋਂ ਲੈ ਕੇ ਸਭ ਕੁਝ ਤੱਕ ਖੱਬਿਓਂ-ਸੱਜੇ ਵੱਲ ਦੌੜਦਾ ਏ ਤੇ x ਹੁਣ ਕੀ ਏ ਤੇ ਕਿੰਨਾਂ ਏ ਦਸਦਾ ਹੇਠਾਂ ਤੋਂ ਉੱਪਰ ਵੱਲ ਨੂੰ ਨਸਦਾ ਏ। ਜਦੋਂ ਕੋਈ ਕੁਝ ਨਹੀਂ ਹੋਵੰਦਾ ਤੇ ਕਿਹੇ-ਥਾਂ ਨਹੀਂ ਹੋਵੰਦਾ, ਓਦ੍ਹਾ ਕੋਈ ਮਤਲਬ ਨਹੀਂ ਹੋਵੰਦਾ, ਤੇ ਓਸ ਬਾਰੇ ਬਹੁਤਾ ਸੋਚਣਾ ਨਹੀਂ ਚਾਹੀਦਾ।

ਪਰ ਜੇ ਕੋਈ ਗੱਲ ਹੈ ਵੇ, ਤਾਂ ਓਹ ਕਿੰਨੀ ਕੁ ਏ ਤੇ ਕਿੱਥੇ ਕੁ ਪੁੱਜੀ ਏ, ਇਨ੍ਹਾਂ ਸਵਾਲਾਂ ਦੇ ਹੱਲ x|y ਕਢਦੇ ਨ। ਇਹ ਦੋਵ੍ਹੇਂ ਲੋਕਾਂ ਦੇ ਸਿਰਾਂ ਚ ਰਹਿੰਦੇ, ਓਨ੍ਹਾ ਨੂੰ judge ਕਰਦੇ ਰਹਿੰਦੇ ਨ। ਅਜੇ ਇਨ੍ਹਾਂ ਬਾਰੇ ਇਤਨਾ ਹੀ ਬਹੁੰ ਏ। ਇਨ੍ਹਾਂ ਨੂੰ ਰਤਾ ਖਿੱਚ ਕੇ ਨਾ ਰੱਖੋ ਤਾਂ ਪੂਰੀ ਕਿਤਾਬ ਵੀ ਖਾ ਸਕਦੇ ਨ। ਬਿੱਲੀਆਂ ਵੀ ਮੈਂ-ਨੂੰ confuse ਕਰਦੀਆਂ ਨ, ਪਰ ਇਨ੍ਹਾਂ ਨਾਲ਼ੋਂ ਵੱਧ ਨਹੀਂ।